Валентин Кельмаковез зечкыланы вуизы Татьяна Ишматова – Кун кенешысь депутат, Александр Шутов – кылосбур тодосъёсъя доктор, Удмурт Кун университетысь профессор; Людмила Карпова – кылосбур тодосъёсъя доктор, Удмурт Кун университетысь доцент; Веньямин Ившин – «Удмуртия» книгапоттоннилэн валтись редакторез, Виктор Шибанов – кылосбур тодосъёсъя доцент, Надежда Ураськина – Удмурт Элькунысь дышетон удысын национальной ужпумъёсты тодон-эскеронъя институтлэн кивалтисез, Егор Загребин – гожъясьчи но мукетъёсыз.
Вераськон мыниз удмурт кыллэн но литературалэн азинсконаз «Удмурт синоним кыллюкамлэн» кулэлыкез пумысен, лыдзетлэн удмурт литератураез но удмурт кылэз узырмытэмез сярысь.
Вить толэзь куспын Валентин Кельмаков кыллюкамез быдэстиз. «Пуштроссыя матысь кылъёсты шедьтон понна, трос удмурт литератураысь ужъёсты пыр-поч лыдзыса потыли (кылсярысь, «Вуж Мултан», «Зардон азьын»). Кыллюкаме диалект кылъёсты но пырти, пусйисько – соос гожъясьчиослэн ужъёсысьтызы басьтэмын. Шуг-секытъёс трос ик ой вал ке но, таче уж туж трос дырез быдтэ», - шуэ Валентин Кельмакович. Кыллюкаме ваньмыз кылъёс овол на пыртэмын, 4/5 люкетыз лыдзетэ пыртымтэ, коньдон но ичигес вылэм.
«Удмурт синоним кыллюкам» нырысь ик юрттэт сетоз школаысь дышетисьёслы но дышетскисьёслы, озьы ик сое уже кутыны быгатозы вузъёсын дышетисьёс но дышетскисьёс, газетчиос, гожъясьёс но кылбурчиос, берыктисьёс, удмурт кылын гожъясь но сое эскерись тодосчиос но трос мукетъёсыз.
Кыллюкам Финляндиысь Кастрен огазеяськонлэн юрттэмезъя дуннеез адзиз но «Удмуртия» книгапоттонниын потиз. Лыдзетлэн тиражез 3 сюрс 100 экземпляр. Эркын вузаськоз 600-эз гинэ.
Лыдзетэн тодматскон жытын чузъяськизы трос шуныт кылъёс, зечкыланъёс. Валентин Кельмаковичез пайдаё ужез понна чебер сяськаосын зечкылазы.
Ирина Анчукова
